Муассисаи давлатии “Тоҷикфилм” наворбардорӣ ва таҳияи филми мустанадро бахшида ба 700-солагии Ҳофизи Шерозӣ оғоз намуд. Дар ин бора аз “Тоҷикфилм” хабар доданд.
Филмномаи филми мазкур бо иштироки олимони шинохтаи тоҷик Шодимуҳммад Сӯфизода, Муҳриддин Низомӣ, Бадриддин Мақсудов ва Шарифмурод Исрофилниё дар ҳамкорӣ бо мутахассисони Муассисаи давлатии «Тоҷикфилм” дар зарфи 2 моҳ омода гардидааст. Филмнома мавзуҳои ишқ, риндӣ, назарбозӣ, инъикоси замона, оптимизми Ҳофиз (некбинӣ ва ҳаётдӯстӣ), андешаҳои хайёмона, сабки Ҳофиз, шуҳрати Ҳофиз, Ҳофизи Шерозӣ- шоир, файласуф ва мутафаккир, зарурати шинохти осори адабии Ҳофиз, Ҳофиз ва таъсири эҷодиёти ӯ ба фарҳангҳои ҷаҳонӣ, ҷойгоҳи инсони озодманиш дар ашъори Ҳофиз, арзишҳои инсондӯстӣ, сулҳофаринӣ ва таҳаммулпазирӣ дар эҷодиёти Ҳофиз, даъвати Ҳофиз ба маҳви хурофоту таассуби динӣ, тараннуми дӯстӣ дар ашъори Ҳофиз, ниёзҳои ҷаҳони имрӯз ба дарси андешаҳои Ҳофиз, вижагиҳои мумтози ашъори Ҳофиз аз назари мунаққидони адабӣ ва фалсафӣ, нақши ашъори Ҳофиз дар рушди мусиқӣ, бавижа “Шашмақом”, панди Ҳофиз ҳидоятгари инсонҳо ба сӯи камолоти маънавиро фаро хоҳад гирифт.
Коргардони филми мазкур Рустам Сатторзода буда, бо таҳияи филми мустанади “Шинохти Саразм” тавонистааст, таъриху фарҳанги миллатро тавассути синамо муаррифӣ намояд.
