Дар партави дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва бо мақсади сазовор истиқбол гирифтани ҷашни бузурги 35-солагии Истиқлоли давлатии Ҷумҳурии Тоҷикистон дар шаҳри Хуҷанд корҳои бунёдкориву созандагӣ бо маром идома дорад.
Бо саҳми Ҳукумати ҷумҳурӣ, Мақомоти иҷроияи ҳокимияти давлатии вилояти Суғд, мақомоти маҳаллӣ ва соҳибкорону саховатмандон дар тамоми шаҳру ноҳияҳои вилоят, аз ҷумла шаҳри Хуҷанд, бунёди мактабу кӯдакистонҳои нав, синфхонаҳои иловагӣ ва дигар иншооти иҷтимоӣ бо шитоб ба роҳ монда шудааст.
Раиси вилояти Суғд Раҷаб Аҳмадзода зимни боздид аз ҷараёни корҳои сохтмонӣ дар чандин иншооти муҳим, ба масъулин ҷиҳати иҷрои босифат ва саривақтии корҳо дастуру супоришҳои мушаххас дод.
Яке аз чунин иншооти муҳими таълимӣ бинои иловагии Гимназияи №1-и шаҳри Хуҷанд мебошад, ки бо ташаббуси ширкатҳои сохтмонӣ дар асоси ҳидоятҳои Сарвари давлат бунёд гардида истодааст. Тибқи лоиҳа, бино аз 4 ошёна ва таҳхона иборат буда, барои 1400 нафар хонанда дар ду баст пешбинӣ шудааст.
Раиси вилоят саҳми ширкатҳои сохтмониро дар татбиқи барномаҳои ободонӣ ва рушди инфрасохтор баланд арзёбӣ намуда, зикр кард, ки ин гуна иқдомҳо ҷавоб ба ғамхориҳои давлату Ҳукумат маҳсуб меёбанд.
Аз иншооти дигари муҳташам маҷмааи варзишии “Суғд-Арена” мебошад, ки дар доираи дастуру супоришҳои Пешвои миллат дар шаҳри Хуҷанд бо маблағгузории Мақомоти иҷроияи ҳокимияти давлатии вилоят сохта мешавад.
Дар ин маҷмаа толорҳои муосир барои намудҳои гуногуни варзиш, аз ҷумла бокс, гуштингирӣ, тэквандо, гимнастикаи бадеӣ, тенис, шашкаву шоҳмот, инчунин толорҳои бузург барои баргузории мусобиқаҳои сатҳи байналмилалӣ пешбинӣ гардидааст. Ҳамзамон, толори фитнес, маркази барқарорсозӣ, ошхона, мағозаҳои фурӯши лавозимоти варзишӣ, марказҳои омӯзишӣ барои мураббиён ва дигар инфрасохтори зарурӣ дар назар аст.
Баъд аз мавриди истифода қарор гирифтани “Суғд-Арена”, то 1000 нафар метавонанд дар як вақт машқу тамрин намоянд ва даҳҳо нафар бо ҷойи кори доимӣ таъмин мегарданд.
Дар шаҳри Хуҷанд бинои наву замонавии Палатаи савдо ва саноати вилояти Суғд низ сохта шуда истодааст. Иншоот аз таҳхона ва 4 ошёна иборат буда, дорои утоқҳои корӣ, толорҳои конфронс, намоишгоҳ ва дигар инфрасохтори зарурӣ мебошад. Пудратчии иншоот ҶДММ «Сохтмони Истиқлол» буда, ба он дастур дода шуд, ки бо истифода аз имконот корҳои сохтмониро сари вақт ва бо сифати баланд анҷом диҳад.
Инчунин, биноҳои нави Суди вилояти Суғд ва Шуъбаи корҳои дохилии шаҳри Хуҷанд низ сохта шуда истодаанд, ки аз таваҷҷуҳу ғамхориҳои доимии Ҳукумати мамлакат ва мақомот нисбати кормандони соҳаи ҳифзи ҳуқуқ гувоҳӣ медиҳад.
Тавре масъулин иттилоъ доданд, ба истиқболи ҷашни 35-солагии Истиқлоли давлатӣ беш аз 950 иншооти ҷашнӣ дар шаҳри Хуҷанд ба нақша гирифта шуда, аксари онҳо мавриди истифода қарор дода шудааст.
