22 августи соли 2025, соати 18:00 дар Филармонияи давлатии ба номи Акашариф Ҷӯраев, маҳфили шеъри Шоири халқии Тоҷикистон Алимуҳаммад Муродӣ баргузор мегардад. Дар ин бора аз Вазорати фарҳанги Тоҷикистон хабар доданд.
Дар маҳфил ҳунармандони шинохтае, ки шеърҳои устодро бо оҳангҳои дилнишин зинат бахшидаанд, ҳузур ёфта, ба чорабинӣ фазои болидарӯҳӣ зам хоҳанд кард.
Ёдовар мешавем, ки Алимуҳамммад Муродӣ 3 августи соли 1945 ба ҷаҳон омада, соҳиби номаи камоли мактаби миёнаи зодгоҳаш гардидааст. Хатмкардаи факултаи филологияи тоҷики Донишгоҳи давлатии Тоҷикистон ба номи В. И. Ленин, ҳоло Донишгоҳи миллии Тоҷикистон аст. Солҳои зиёде дар матбуот кор карда, чанде муҳаррири рӯзномаи ноҳияи Ёвон, мудири шуъбаи рӯзномаи Қӯрғонтеппа, сармуҳаррири редаксияи мусиқии телевизиони ҷумҳурӣ, мудири шуъбаи нақди адабии маҷаллаи «Садои Шарқ» будааст.
Маҳсули қалами Алимуҳаммад Муродӣ тавассути маҷмӯаҳои «Дастниҳол», «Боғи мурод», «Нози Наврӯз», «Чароғи рӯзадор», «Хайрбоди баҳор» ва чандин маҷмӯаҳои дастҷамъӣ дастраси хонандагон гардидааст.
