15 декабр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ дар деҳоти«20-солагии Истиқлоли Тоҷикистон»—и ноҳияи Вахш Ҷамъияти дорои масъулияти маҳдуди “Насими Вахш»”-ро мавриди баҳрабардорӣ қарор доданд.
Ин корхона, ки фаъолияташ ба самти нассоҷӣ ва дӯзандагӣ нигаронида шудааст, аз ҷониби соҳибкори ватанӣ Бароталӣ Юсуфзода барои дар сатҳи баланд пешвоз гирифтани ҷашни 35-солагии Истиқлоли давлатии Ҷумҳурии Тоҷикистон сохта ва бо дастгоҳу технологияи муосири бофандагию дӯзандагӣ муҷаҳҳаз гардонида шудааст.
Дар корхонаи «Насими Вахш» асосан ҷӯроб, либоси ягонаи мактабӣ ва дигар намуди либосҳои фармоишӣ истеҳсол мешавад.
Дар коргоҳи нассоҷии корхона 250 дастгоҳи ҷӯроббофӣ, 15 дастгоҳи худкор ва 7 дастгоҳи тамғагузории истеҳсоли кишварҳои пешрафтаи ҷаҳон ворид ва васлу насб гардидаанд.
Ба Президенти мамлакат муҳтарам Эмомалӣ Раҳмон иттилоъ доданд, ки дар корхонаи «Насими Вахш» 180 нафар занони хонанишин бо ҷойи кори доимӣ ва маоши хуб таъмин шудаанд.
Иқтидори истеҳсолии коргоҳ бо васеъ намудани доираи фаъолият афзоиш дода мешавад. Корхона иқтидор дорад дар як сол 15 миллион ҷуфт ҷӯроби хушсифат истеҳсол намояд.
Ашёи хом, аз ҷумла ришта барои омода намудани ҷӯроб аз дохил ва қисман аз хориҷи мамлакат дастрас шуда, дар асоси меъёрҳои байналмиллалӣ аз он маҳсулоти ивазкунандаи воридот омода мешавад. Ҷӯробҳои дар корхона истеҳсолшаванда дар баробари таъмини бозори дохилӣ ба хориҷи мамлакат низ содирот мегарданд.
Аснои шиносоӣ Пешвои миллат муҳтарам Эмомалӣ Раҳмон ба шароити муосири корӣ ва раванди истеҳсолот дар корхона баҳои баланд доданд.
Ёдовар мешавем, ки ҳадафи асосии бунёди корхона дар ноҳияи Вахш- ин коркарди ниҳоии ашёи хоми маҳаллӣ ва аз он истеҳсол намудани маҳсулоти тайёр мебошад. Маҳсулоти тайёре, ки дар корхона тавлид меёбад, 80 фоизи он аз пахта омода мешавад ва таваҷҷуҳи харидорони ватаниву хориҷӣ ба он зиёд мегардад.
Бояд иброз намуд, ки дар коргоҳ дӯхти либоси мактабӣ низ амалӣ шуда, навтарин технология аз кишварҳои тараққикардаи дунё ворид ва бо ҷалби мутахассисони ватанӣ васлу насб шудаанд.
Дар коргоҳи дӯзандагӣ 56 духтари маҳаллӣ, ки аксаран хонашин мебошанд, ба кор ҷалб гардидаанд. Корхона иқтидор дорад хонандагони муассисаҳои таҳсилоти миёнаи умумии ноҳияи Вахшро пурра бо либоси ягонаи мактабӣ таъмин намояд.
Бо назардошти афзоиши талабот ба ҷӯроби хушсифати ватанӣ масъулини корхона маҳсулотро бо сифати баланд истеҳсол намуда, ба мизоҷон пешниҳод менамоянд. Ин иқдом дар доираи Солҳои рушди санот (2022-2026) ва дастгирии давлатии бахши хусусӣ амалӣ мешавад.
Ҷӯробҳои истеҳсолкардаи корхона асосан маҳсулоти ивазкунандаи воридот ба шумор рафта, бо нархҳои дастрас пешниҳоди харидорон мегарданд.
Дар маҷмуъ бо сохта, ба истифода додани корхонаи нассоҷӣ ва дӯзандагии «Насими Вахш» тибқи нақшаи тиҷоратӣ дар сурати пурра фаъол гардонидани корхона 400 сокини маҳаллӣ, хусусан занони хонанишин бо ҷойи кори доимӣ ва маоши хуб таъмин мешаванд.
Пешвои муаззами миллат муҳтарам Эмомалӣ Раҳмон ҷиҳати рушд бахшидани соҳаи саноат, истеҳсоли маҳсулоти хушсифати ивазкунандаи воридот, таъмини аҳолӣ бо маҳсулоти ватанӣ ва таъсиси ҷойҳои нави корӣ ба масъулон супоришҳои мушаххас доданд.
Баъд аз ифтитоҳи корхонаи нассоҷӣ ва дӯзандагии “Насими Вахш” дар ҳаминҷо Пешвои миллат муҳтарам Эмомалӣ Раҳмон бо лоиҳаи бунёди корхонаи ресандагӣ шинос шуданд.
Корхонаи мазкур дар доираи нақшаи чорабиниҳо ба ифтихори ҷашни 35-солагии Истиқлоли давлатии Ҷумҳурии Тоҷикистон бунёд гардида, дар он барои 200 нафар занони хонашин ҷойи кории нав фароҳам оварда мешавад.
Ёдовар мешавем, ки корхонаи мазкур дар масоҳати 1 гектар сохта шуда, дар як сол 4000 тонна пахта коркард ва аз он маҳсулоти тайёр истеҳсол мегардад.
Президенти мамлакат муҳтарам Эмомалӣ Раҳмон зимни шиносоӣ ба лоиҳаи бунёди корхонаи нави саноатӣ таваҷҷуҳи масъулони соҳаро барои ичрои саривақтии корҳои сохтмонӣ, ворид намудани техонологияи муосир ва истеҳсоли маҳсулоти рақобатпазир ҷалб намуданд.
