Дар доираи COP-29, ки дар шаҳри Бокуи Ҷумҳурии Озарбойҷон баргузор шуда истодааст, аз ҷониби раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон бо роҳбарони ҳайатҳои ҷумҳуриҳои Озарбойҷон, Қатар ва Чин мулоқотҳои дуҷониба анҷом дода шуд. Мулоқотҳо бо раиси COP-29 ҷаноби Мухтор Бабаев, вазири муҳити зист ва тағирёбии иқлими Қатар, доктор Абдуллоҳ бин Туркӣ Ал-Субай ва муовини вазири экология ва муҳити зисти Чин ҷаноби Чжао Юнгмин баргузор гардиданд. Дар ин бора аз Кумитаи ҳифзи муҳити зисти назди Ҳукумати Ҷумҳурии Тоҷикистон хабар доданд.
Аз ҷониби Баҳодур Шерализода дар чаҳорчӯбаи ин вохӯриҳо бо ҳамтоёни худ аз муҳимтарин иқдомоти Президенти Ҷумҳурии Тоҷикистон муҳтарам Эмомалӣ Раҳмон ҷиҳати ҳифзи пиряхҳо маълумот дода шуд. Инчунин, қайд гардид, ки ин ташаббус аз ҷониби Маҷмаи Умумии Созмони Милали Муттаҳид дастгирӣ ёфта, дар қатъномаи дахлдор оид ба эълони соли 2025 Соли байналмилалии ҳифзи пиряхҳо расман қайд карда шудааст. Илова бар ин, раиси Кумита оид ба рафти омодагии Тоҷикистон ба Конфронси байналмилалии сатҳи баланд, ки моҳи майи соли 2025 пешбинӣ шудааст, маълумот дода, ҳайатҳои кишварҳои ширкаткунандаро ба иштирок дар ин чорабинии муҳим даъват намуд.
Ин вохӯриҳо як қадами муҳим дар самти таҳкими ҳамкориҳои байналмилалӣ дар соҳаи муҳити зист ва тағйирёбии иқлим гардида, ба пешсафии глобалии Тоҷикистон дар ташаббусҳои тағйирёбии иқлим ва об шаҳодат медиҳад.
