Миёни китобхонаҳои Тоҷикистон ва Китобхонаи марказии Токио ҳамкориҳои муштарак барқарор мешаванд. Ин масъала зимни мулоқоти Сафири Ҷумҳурии Тоҷикистон дар Япония Мирзошариф Ҷалолов бо Директори Китобхонаи марказии Токио ҷаноби Фукузаки Хироши баррасӣ шуд. Дар ин бора аз Сафорати Ҷумҳурии Тоҷикистон дар Япония хабар доданд.
Ба иттилои манбаъ, ҷонибҳо дар робита ба барқарор намудани ҳамкориҳои муштарак миёни китобхонаҳои ду кишвар, аз ҷумла дар самти фаъолияти китобдорӣ ва китобхонашиносӣ мубодилаи афкор намуданд.
Ҳамзамон дар мулоқот оид ба ташкили намоишҳои китоб дар Тоҷикистону Япония ва мубодилаи коршиносон дар тамоми соҳаҳои китобдорӣ ибрози назар карда шуд.
Дар фарҷом ба Китобхонаи марказии Токио чанд нусха аз китоби “Хазинаи тиллоии тоҷикон” (муаллиф Ҳамрохон Зарифӣ), ки соли ҷорӣ ба забони японӣ ба нашр расид, тақдим гардид.
