Давоми 20 рӯзи ҷараёни даъвати навбатии шаҳрвандон ба хизмати ҳатмии ҳарбӣ маъракаи даъват дар қаламрави ҷумҳурӣ 66 фоиз иҷро шуд. Дар ин бора аз Вазорати мудофиаи ҷумҳурӣ хабар доданд.
Дар ин замина шаҳру навоҳии Вилояти Мухтори Кӯҳистони Бадахшон, ноҳияҳои Рашт, Сангвор, Лахш, Нуробод, Тоҷикобод, Вахш ва Фархор дар нахустин рӯзи даъват аввалин шуда дар ҷумҳурӣ аз иҷрои пурраи нақшаи пешбинишуда гузориш доданд.
Бо ҳамин тартиб, давоми 20 рӯзи моҳи октябри соли равон мақомоти вобастаи давлатии даъват дар шаҳру ноҳияҳои тобеи ҷумҳурӣ натиҷаҳои дилхоҳу назаррас ба даст оварда, иҷрои нақшаро ба 73,3 фоиз баробар намуданд.
Даъвати шаҳрвандон ба сафи Қувваҳои Мусаллаҳ дар вилояти Хатлон низ муташаккилона ва дар сатҳи баланд идома дошта, масъулини вобастаи ин маъракаи муҳими сиёсӣ давоми ду даҳрӯза ба муваффақияти назаррас ноил гардиданд. Зимнан, аз 1 то 20 октябри соли равон шаҳру навоҳии вилояти Хатлон аллакай иҷрои нақшаи даъвату гусели ҷавонписарони Ватанро ба сафи Артиши миллии мамлакат 71 фоиз иҷро намуданд.
Новобаста аз он ки чорабиниҳои даъватии шаҳрвандон ба хизмати ҳатмии ҳарбӣ ду моҳ идома меёбанд, масъулини мақомоти вобастаи давлатии даъват дар шаҳру ноҳияҳои вилояти Суғд низ аллакай давоми 20 рӯзи ҷараёни ин маъракаи муҳими сиёсӣ иҷрои нақшаро ба 54 фоиз баробар намудаанд.
Ҳамин тавр, дар муддати 20 рӯзи даъвати тирамоҳии соли равон иҷрои нақшаи пешбинигардида дар шаҳри Душанбе қариб 65 фоизро ташкил дода, масъулини мақомоти вобастаи давлатии даъват дар чаҳор навоҳии пойтахт азм доранд, ки ин чорабинии муҳими сиёсиро бо сифати баланд ва пеш аз муҳлат ба анҷом расонанд.
Ёдовар мешавем, ки дар доираи талаботи Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» ва баҳри дар амал татбиқ намудани Фармони Президенти Ҷумҳурии Тоҷикистон «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таввалуди 1996-2005-и Ҷумҳурии Тоҷикистон ба хизмати ҳарбӣ» маъракаҳои даъвати тирамоҳии шаҳрвандон ба хизмати ҳарбӣ аз якуми октябри соли равон дар тамоми шаҳру навоҳии мамлакат муташаккилона оғоз ёфта, то охири моҳи ноябр идома меёбанд.
