27 апрели соли ҷорӣ бо иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон ва Мақомоти иҷроияи ҳокимияти давлатии шаҳри Душанбе дар маҳаллаи Зарафшони шаҳри Душанбе таҳти унвони “Бозиҳои тоза” барои дарёфти Ҷоми авруосиёгӣ ва бо ҷалби намояндагони ташкилотҳои давлатӣ, ширкатҳои тиҷоратӣ, муассисаҳои таҳсилоти олӣ ва муассисаҳои таҳсилоти миёнаи умумии пойтахт мусобиқаи экологӣ баргузор гардид. Дар ин бора аз Кумитаи ҳифзи муҳити зисти назди Ҳукумати Ҷумҳурии Тоҷикистон хабар доданд.
Дар мусобиқаи “Бозиҳои тоза” дар ш. Душанбе намояндагони ширкати “Шивер Тоҷикистон”, фӯрушгоҳи “Ашан” ва филиалҳои он “Би 1”, аъзои маҳфили эковолонтёрони Кумита, Кумитаи ҷавонон ва варзиши назди Ҳукумати Ҷумҳурии Тоҷикистон, хонандагони муассисаҳои таҳсилоти миёнаи умумии №95 ва 87-и ноҳияи Синои шаҳри Душанбе дар маҷмӯъ беш аз 140 нафар “бозингарон”, яъне дӯстдорони табиат иштирок доштанд.
Пеш аз оғози бозӣ ба иштирокдорон аз тарафи масъулони чорабинӣ викторинаи экологӣ иборат аз 10 савол ташкил карда шуд. Баъди эълони бозӣ бо вуҷуди ҳавои боронӣ иштирокдорон бо майли том гирду атрофи маҳаллаи Зарафшонро аз партовҳои гуногун, ки ҳусни атрофро коста мегардонанд, тоза намуданд.
Пас аз итмоми бозӣ ба ҳамаи иштирокдорон шириниҳо тақсим карда шуд ва ба ҷуз аз гурӯҳҳое, ки ҷойҳои якуму дуюм ва сеюмро ишғол намуданд, се гурӯҳи дигар барои “бозёфтҳои нодир”-ашон аз дохили партовҳо тибқи шарти сабқат, бо пешниҳоди маълумотҳои ҷолиб, соҳиби дипломҳо гардиданд.
Имрӯз мусобиқаи “Бозиҳои тоза”, ҳамчунин дар шаҳри Хуҷанди вилояти Суғд бо дастгирии Сарраёсати ҳифзи муҳити зист дар вилояти Суғд бо шукӯҳу тантана баргузор карда шуд.
Ёдовар мешавем, ки мусобиқаи экологии “Бозиҳои тоза”, ки дар Ҷумҳурии Тоҷикистон бо иқдоми Кумитаи ҳифзи муҳити зист ҷараён дорад, рӯзи 29 апрели соли 2024 ба охир мерасад.
