Дар майдони назди бинои Раёсати Вазорати корҳои дохилӣ дар Вилояти Мухтори Кӯҳистони Бадахшон ба ифтихори Рӯзи милитсияи тоҷик ҷамъомади тантанавӣ ва гузашти низомӣ баргузор гардид, ки дар он роҳбарони мақомоти иҷроияи ҳокимияти давлатии вилоят, сохторҳои интизомӣ, ҳайати шахсӣ ва собиқадорони соҳа иштирок намуданд. Дар ин бора аз МИҲД-и ВМКБ хабар доданд.
Сардори Раёсати Вазорати корҳои дохилӣ дар Вилояти Мухтори Кӯҳистони Бадахшон Шариф Назарзода ҳамкорону ҳамкасбони худро бо Рӯзи милитсияи тоҷик табрик намуда, изҳор дошт, ки “имсол ин иди касбӣ дар доираи тантанаҳои бошукуҳи фархундаи ҷашни таърихии 31-солагии Иҷлосияи 16-уми Шурои олии Ҷумҳурии Тоҷикистон таҷлил мегардад, ки ин мояи ифтихори ҳар тоҷику тоҷикистонӣ ба шумор меравад. Кормандони ин ниҳоди муҳими давлатӣ бо дарки баланди худшиносии миллӣ ва ватандӯстӣ вазифаи муқаддасу ҷонии худро сарбаландона ба ҷо меоранд. Дар ин муддат мақомоти корҳои дохилӣ ба ниҳоди боэътимоду пурқувват, кафили амнияту бехатарии ҷумҳурӣ ва фаъолтарин сохтори қудратии мамлакат мубаддал гардида, имрӯз низ рисолати баланди худро бо сарбаландӣ иҷро менамояд”.
Раиси Вилояти Мухтори Кӯҳистони Бадахшон Алишер Мирзонабот низ кормандони милитсияи тоҷикро бо иди касбиашон табрик намуда, баён дошт, ки “милитсияи тоҷик аз нахустин рӯзҳои таъсис дар ҷумҳурии тозаистиқлол роҳи душвору сангинеро тай намуда, дар таҳкими волоияти қонун, тартиботи ҷамъиятӣ ва адолати иҷтимоӣ нақши муассир гузоштааст”.
Дар ин рӯз барои хизматҳои содиқона, садоқат ба савганд, интизоми намунавӣ ва фаъолияти хуби корӣ бо фармони Вазири корҳои дохилии Ҷумҳурии Тоҷикистон ба як зумра кормандони мақомоти корҳои дохилӣ ва собиқадорони соҳа медалу ифтихорнома ва туҳфаҳои хотиравӣ супорида шуданд.
