Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар доираи ҳамкориҳои мутақобилан судманди Ҳукумати Ҷумҳурии Тоҷикистон бо як қатор кишварҳои олам, ҳамкориҳои хешро низ бо як қатор мамолики олам дар самти мубодилаи таҷрибаи табибони кишвар ва ба такмили ихтисос фаро гирифтани онҳо ба роҳ мондааст. Дар ин бора аз маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд.
Дар доираи чунин ҳамкориҳо табибони тоҷик ба кишварҳои гуногуни олам сафар намуда, бо ҳамтоёни хориҷии хеш табодули таҷриба намудаву дар ин самт дониш ва малакаи касбии хешро боз ҳам баланд мебардоранд.
Аз ҷумла, бо мақсади иштирок дар даври омӯзишӣ роҷеъ ба «Идоракунӣ ва нигоҳдории таҷҳизоти тиббӣ», ки аз 20 январ то 23 феврали соли 2023 дар шаҳри Токиои Япония дар назар дошта шудааст, аз 20 январ то 24 феврали соли 2023 Бузуруков А. ва Эшонов А., мутахассис-муҳандисони КВД «Тоҷиктибтаҷҳизот» ба шаҳри Токиои Япония сафарбар карда шуданд.
Инчунин, бо мақсади гузаштани такмили ихтисос ва баланд бардоштани савияи дониш Ҷумаев Ш.М., Холов С.А., Иброҳимова Р.,-мутахассисони Муассисаи давлатии “Пажӯҳишгоҳи илмии клиникии стоматологӣ ва ҷарроҳии ҷоғу рӯй», инчунин, Исупов С.С., ҷарроҳи ҷоғу рӯйи Муассисаи давлатии «Маркази миллии тиббии «Шифобахш», Зиёзода М.Р., ҷарроҳи чашм, ассистенти кафедраи офталмологи Муассисаи давлатии «Донишгоҳи давлатии тиббии Тоҷикистон ба номи Абӯалӣ ибни Сино», Қосимов А.Ҳ., ҷарроҳи чашми Муассисаи давлатии «Маркази тиббии «Шифобахш» ва Мирзораҳимов Ҳ., мудири шуъбаи ҷарроҳии чашми Беморхонаи марказии шаҳри Конибодом аз 12 январ то 20 апрели соли 2023 ба шаҳри Машҳади Ҷумҳурии Исломии Эрон сафарбар гардиданд.
