7 августи соли 2025 вохӯрии роҳбарияти Корхонаи воҳиди давлатии «Роҳи оҳани Тоҷикистон» бо намояндагони ширкати байналмилалии «Nafith Logistics» баргузор шуд. Дар вохӯрӣ масъалаҳои рақамикунонӣ ва идораи равандҳои логистикӣ мавриди баррасӣ қарор гирифтанд. Дар ин хусус аз Корхонаи воҳиди давлатии «Роҳи оҳани Тоҷикистон» хабар доданд.
Зимни суҳбат ҷонибҳо ҳамчунин масъалаҳои марбут ба автоматикунонии равандҳои логистикӣ, назорати гумрукӣ, рушди терминалҳо ва истифодаи технологияҳои инноватсионӣ дар интиқоли маҳсулоти саноатӣ ва боркашонӣ тавассути роҳи оҳанро баррасӣ карданд.
Ҷонибҳо барои таҳкими ҳамкорӣ ва татбиқи лоиҳаҳои муштарак дар самти рақамикунонии соҳаи логистика изҳори омодагӣ намуданд.
Ёдовар мешавем, ки ширкати «Nafith Logistics» соли 2003 таъсис ёфта, дар соҳаи рушди логистика ва рақамикунонии равандҳои марбут ба боркашонӣ фаъолият дорад.
